რას ამბობენ, მიშა მესხი და ტორნადო გაბუნია ერთმანეთთან დაპირისპირებაზე?
როგორც ცნობილი გახდა,3 მარტს, სამოქალაქო აქტივისტს და მუსიკოს დათა (ტორნადო) გაბუნიას ქუჩაში ფიზიკურად და სიტყვიერად შეურაცხყოფა მიაყენეს. გავრცელებული ინფორმაციით, მას მომღერალ სოფო ბედიას ქმარი, მიშა მესხი დაესხა თავს, რაც თავად მესხმაც მოგვიანებით “ფეისბუქზე” დაადასტურა.
შემთხვევის ამსახველი ვიდეოში ისმის, როგორ უსვამს კითხვას თავდამსხმელი გაბუნიას მის საპროტესტო სიმღერაზე “ოლე, ოლა”, შემდეგ კი ხელს ურტყამს და შეურაცხყოფას აყენებს.
Ambebi.ge დილიდან ცდილობდა, კონფლიქტის მხარეებთან დაკავშირებას. საკრებულოს ყოფილი დეპუტატი დაკავებული არ არის, რადგან, როგორც ირკვევა, მხარეები იმ ღამესვე მორიგდნენ. მიშა მესხის თქმით, ისინი პატრულმა შეარიგა…
მიშა მესხი:
– რატომ უნდა ვიყო დაკავებული, როცა პატრულმა შეგვარიგა? დავაფიქსირეთ, რომ ერთმანეთთან პრეტენზიები არ გვაქვს.
– შემთხვევის ადგილზე შერიგდით?
– დიახ, არც გაბუნიას ჰქონდა პრეტენზია და არც – მე. ეს დაფიქსირებულია შსს-ში, გადაღებულიც არის, გაბუნიას ხელიც აქვს მოწერილი. რატომ ავრცელებენ ამას ისე, როგორც უნდათ, არ ვიცი. უბრალოდ, ქართულად, ჯიგრულად, კაცურად თუ ადამიანურად, გაუგებრობა მოხდა. შემდეგ რაც ამას მოჰყვა, ძალიან ცუდია, მე არ ვამბობ, რომ კარგია, ადამიანები ვართ და ყველას გვაქვს ჩვენი თავმოყვარეობა და ნერვები.
– მიშა, შეგიძლიათ გაიხსენოთ როგორ დაიწყო თქვენს შორის კონფლიქტი?
– რესტორან “სტელაში“ ვიყავით, მე, ჩემი მეუღლე, მისი ორი მეგობარი და ჩემი მეგობარი. ასევე ერთი ბიჭი, რომელიც ქუჩაში დოლზე უკრავს და ჩვენთან ერთად შემოვიპატიჟე. იქვე მაგიდასთან დავინახე დათა გაბუნია. ექვსნი იყვნენ და ერთი გოგონა ახლდათ. გაბუნია იგინებოდა, აგრესიული იყო, შემდეგ ეცადა თავისი ცნობილი სიმღერით “ოლე ოლათი“ მაინც გამოვეყვანე მდგომარეობიდან. ამ დროს უკვე რესტორნიდან და დაიწყო ჩვენს შორის ჩხუბი, გაწევა-გამოწევა, იმათაც მოიქნიეს ხელი და ჩვენც.
შემდეგ სამართალდამცველები მოვიდნენ, რომლებსაც დიდი მადლობა მინდა გადავუხადო, ორივე მხარე გამოგვკითხეს. გაბუნიას უნდოდა ჩემგან ბოდიში მიეღო, მაგრამ ვერ მიიღო, თუმცა იმ ზომამდე მივედით, რომ შევრიგებულიყავით და ეს საქმე მშვიდად დამთავრებულიყო. ორივემ ვთქვით, რომ არანაირი პრეტენზია არ გვაქვს.
– ქართულ-ჯიგრულ პონტში შერიგდით?
– მე არ ვარ ბოღმიანი ადამიანი, ძალიან ბევრი შეურაცხყოფა მიმიღია, არამარტო წინა ხელისუფლების დროს. ბევრთან დღეს ვმეგობრობ, არ ჩამრჩენია გულში. ქართველები ცოტანი ვართ და ჯობია ერთმანეთს გავუფრთხილდეთ. არ ვარ ფიზიკური ანგარიშსწორების მომხრე, მაგრამ მეც ჩემი თავმოყვარეობა გამაჩნია. ვიღაცებს უნდათ, რომ თემები აწიონ, მაგრამ გაბუნიას არანაირი პრეტენზია არ ჰქონია. მანაც გააგრძელა გვერდზე ქეიფი და მეც ცოტა ხანს დავრჩი.
– მიშა, ახლა თუ ხართ პოლიტიკაში ჩართული რაიმე სახით?
– “ქართული ოცნების“ დაარსების დღიდან ვარ საზოგადოებრივ ბორდში, მათი მხარდამჭერი ვარ, თბილისის საკრებულოს წევრი ვიყავი, ეს გუნდი ჩემი მეორე ოჯახია, მარტო პარტია არ არის.
– სოციალურ ქსელში წერდნენ, რომ შემდეგი მსახიობი ვანიკო თარხნიშვილი იქნება, რადგან მასაც ემუქრებიან.
– ყველას ჰგონია, რომ ეს დაგეგმილი იყო. თუ ვინმეს რამე პრეტენზია გააჩნია და დაინტერესდება, დეტალურად მოვუყვები რომელი საათიდან დავჯექი რესტორანში, შემდეგ როგორ მოვხვდი შარდენზე, კარაოკეში და სრულიად შემთხვევით ჩავედი “სტელაში”, სადაც დაგვხვდნენ ეს ადამიანები. არავისზე ანგარიშსწორებას არ ვგეგმავ, იმდენი შეურაცხყოფა მიმიღია, სულ ვცდილობ რაღაცები გავატარო. არ ვარ კონფლიქტური ადამიანი ქუჩის ელემენტებით. როდესაც გაბუნია გადიოდა და შეიგინა, მე ვთქვი, ვინც ჩვენ შეგვაგინა იმის დედა-თქო. იმ მაგიდიდან მხოლოდ გოგო მოტრიალდა და იკითხა ვის აგინებთო. ექვსივე გავიდა. წარმოიდგინეთ მათი მაგიდიდან მხოლოდ გოგომ ვერ აიტანა.
– მიშა, პიროვნულად თქვენ გაგინებდათ?
– რა თქმა უნდა, აბა, ვის აგინებდნენ, მიშა მესხის დედაო არ უთქვამს, მაგრამ ისეთ რაღაცებს ეხებოდნენ, რომ ჩემი მისამართით იყო.
- მუსიკოსი დათა გაბუნია ჩვენთან კომენტარში ამბობს, რომ მიშა მესხმა ბოდიში მოუხადა.
“ბოდიშებს მიხდიდა ბოლოს. “ქოცი” ვარო იძახდა ბოლოს მაინც და “ქოცების” დედა მოეკითხა იქვე, პატრულების თანდასწრებით და ეგრე დამთავრდა ეს ამბავი”.
წყარო: ambebi.ge
